വേട്ട തുടർന്ന് മോഹൻലാൽ, ഗ്ലോബൽ ബോക്സ് ഓഫീസിൽ 'എമ്പുരാൻ' മൂന്നാമത്; പിന്നിലാക്കിയത് ഹോളിവുഡ് സിനിമകളെ

വിവാദങ്ങൾ കത്തിപ്പടരുമ്പോഴും ബോക്സ് ഓഫീസ് കുതിപ്പ് തുടർന്ന് മോഹൻലാൽ - പൃഥ്വിരാജ് ചിത്രം 'എമ്പുരാൻ'. ഇന്ത്യയിൽ മാത്രമല്ല വിദേശ രാജ്യങ്ങളിലും സിനിമ റെക്കോർഡുകൾ തകർത്തെറിയുകയാണ്. ഇപ്പോഴിതാ കോംസ്കോറിൻ്റെ റിപ്പോർട്ട് പ്രകാരം മാർച്ച് 27 മുതൽ 30 വരെയുള്ള വീക്കെൻഡിൽ എമ്പുരാനിൽ ആഗോള കളക്ഷനിൽ മൂന്നാം സ്ഥാനം കൈവരിച്ചിരിക്കുന്നു എന്ന വാർത്തയാണ് പുറത്തുവരുന്നത്. വമ്പൻ ഹോളിവുഡ് സിനിമകളെയും ഈ വർഷത്തെ ഏറ്റവും വലിയ വിജയമായ 'ഛാവ'യെയും മറികടന്നാണ് ചിത്രം ഈ നേട്ടത്തിലേക്ക് എത്തിയത്.

ഏകദേശം 19 മില്യൻ ഡോളറാണ് എമ്പുരാന്റെ ഈ വീക്കെൻഡിലെ ആഗോള കളക്ഷൻ, അതായത് 165 കോടി രൂപ. ആഗോള കളക്ഷനിൽ ഡിസ്നിയുടെ 'സ്നോ വൈറ്റ്', ജേസൺ സ്റ്റാഥത്തിന്റെ 'വർക്കിങ് മാൻ' എന്നീ സിനിമകൾക്കു തൊട്ട് പിന്നിലാണ് എമ്പുരാൻ. പാരസൈറ്റ് എന്ന സിനിമയിലൂടെ ഓസ്കർ ലഭിച്ച ബോങ് ജൂൺ ഹോ സംവിധാനം ചെയ്ത മിക്കി 17, വിമൺ ഇൻ ദി യാർഡ്, നോവോകൈൻ എന്നീ വമ്പൻ ഹോളിവുഡ് സിനിമകളെ പിന്തള്ളിയാണ് എമ്പുരാൻ ആഗോള തലത്തിൽ മൂന്നാമതായി എത്തിയത്.

യുകെ ഉൾപ്പെടെയുള്ള വിദേശ മാർക്കറ്റുകളിലും സിനിമയ്ക്ക് വലിയ മുന്നേറ്റമാണ് ഉണ്ടാകുന്നത്. ഷാരൂഖ് ഖാൻ, വിജയ് സിനിമകളുടെ കളക്ഷൻ പോലും മറികടന്നാണ് സിനിമ ജൈത്രയാത്ര തുടരുന്നത്. യുകെ ബോക്സ് ഓഫീസിലെ കളക്ഷൻ നോക്കുമ്പോൾ സിനിമ മൂന്ന് ദിവസം കൊണ്ട് 1.2 മില്യൺ പൗണ്ട് (ഏകദേശം 13.5 കോടി ഇന്ത്യൻ രൂപ) നേടിയെന്നാണ് അനലിസ്റ്റുകൾ റിപ്പോർട്ട് ചെയ്യുന്നത്. ഇന്ത്യൻ സിനിമകളുടെ കളക്ഷൻ നോക്കുമ്പോൾ ഇത് റെക്കോർഡാണ്. വിജയ് ചിത്രം ലിയോ (£1,070,820) ഷാരൂഖ് ഖാൻ ചിത്രം ജവാൻ (£1,005,724) എന്നിവയുടെ കളക്ഷൻ മറികടന്നാണ് എമ്പുരാൻ ഈ റെക്കോർഡ് സ്വന്തമാക്കിയിരിക്കുന്നത്.

സിനിമ ആദ്യ മൂന്ന് ദിനം കൊണ്ട് ഓവർസീസിൽ നിന്ന് 10 മില്യണിലധികം നേടി കഴിഞ്ഞു. മാത്രമല്ല സിനിമ 48 മണിക്കൂർ പിന്നിടും മുന്നേ ആഗോളതലത്തിൽ 100 കോടി ക്ലബിലുമെത്തിയിരുന്നു. മലയാള സിനിമയിലെ പല റെക്കോർഡുകളും സിനിമ മറികടക്കുന്നതിന്റെ ആവേശത്തിലാണ് ആരാധകർ. അതേസമയം എമ്പുരാൻ സിനിമയ്‌ക്കെതിരെയുള്ള തുടര്‍ച്ചയായ സംഘപരിവാര്‍ ആക്രമണത്തിന്റെ പശ്ചാത്തലത്തിൽ മോഹൻലാൽ ഖേദം പ്രകടിപ്പിച്ച് പോസ്റ്റ് പങ്കുവെച്ചിരുന്നു.

ഒരു കലാകാരൻ എന്ന നിലയിൽ എൻ്റെ ഒരു സിനിമയും ഏതെങ്കിലും രാഷ്ട്രീയ പ്രസ്ഥാനത്തോടോ, ആശയത്തോടോ, മതവിഭാഗത്തോടോ വിദ്വേഷം പുലർത്തുന്നില്ല. അതുകൊണ്ട് എൻ്റെ പ്രിയപ്പെട്ടവർക്ക് ഉണ്ടായ മനോവിഷമത്തിൽ എനിക്കും എമ്പുരാൻ ടീമിനും ആത്മാർത്ഥമായ ഖേദമുണ്ടെന്നാണ് മോഹൻലാൽ ഫേസ്ബുക്കിൽ കുറിച്ചത്. മോഹൻലാൽ പങ്കുവെച്ച പോസ്റ്റ് സംവിധായകൻ പൃഥ്വിരാജും നിർമാതാവ് ആന്റണി പെരുമ്പാവൂരും ഷെയർ ചെയ്യുകയുമുണ്ടായി. എൽ 2 ഇ, എമ്പുരാൻ എന്നീ ഹാഷ്ടാഗുകൾക്ക് ഒപ്പമാണ് പൃഥ്വിരാജ് പോസ്റ്റ് ഷെയർ ചെയ്തത്.

Content Highlights: Empuraan creates record at global box office surpassing hollywood films